1. Home
  2. Articles
  3. Viswajanani
  4. విశ్వ కళ్యాణ మాతృశ్రీ

విశ్వ కళ్యాణ మాతృశ్రీ

Magazine : Viswajanani
Language : Telugu
Volume Number : 22
Month : March
Issue Number : 8
Year : 2022

శ్రీ ప్రణవదీప్తి ! జ్ఞానచంద్రికవిరాజ!

దివ్య కళ్యాణజనని! శ్రీ వేదమాత!!

“పున్నెముల ఒడి” – “జిల్లెళ్ళమూడి అమ్మ”!

సత్య – శివ – సుందరాత్మికా! శరణు శరణు!!

 

విశ్వకారుణ్య కాంతుల వెలుగునట్టి,

అపర నైమిశారణ్యమై అలరునట్టి,

చల్లని తపోవనమ్ము – “జిల్లెళ్ళమూడి”!

శ్రీ లొలుకు “అమ్మ” మమతల పాలకడలి!!

 

పెద్ద గుండ్రని బొట్టుయై – విశ్వమెల్ల

ఫాలమున మెఱయగ; చక్రశూలములను

హస్తముల దాల్చ – భక్తజనార్తరక్ష

చేయు – “అద్వైతమాత”ను చేరిగొల్తు!!

 

“అమ్మ’ మాట – వేదోక్తి! దయార్ధ పూర్ణ

“మమ్మ” చూపు! “అమ్మ” నిలయ మఖిల దేవ

తాళి కొలువైన – దివ్య దేవాలయమ్ము!

“అమ్మ” – శ్రీ అనసూయేశ్వరాలయమ్ము!!

 

భవ్య “అం-ఆ” మహామంత్ర దివ్యమూర్తి!

మంగళకరి! రమ్య కరుణామృతఝరి! సక

ల జనకల్పవల్లి! మధురలలిత హృదయ!

అపర “లలితాంబ” = స్వర్ణ సుమాంజలులివె!!

అన్నార్తులకు కూర్మి నన్నము పెట్టి – ‘ఆ

కలి’ తీర్చునట్టి – “బంగారు తల్లి”!

గోశాల నిర్మించి – గో లక్ష్ముల కరుణ

పాలించు చల్లని – “పాలవెల్లి”!

సంస్కృతాంధ్రాగమ – శాస్త్ర విజ్ఞానాల

యాల నిర్మించిన – ఆర్షజనని!

వేదపండిత – సుకవీశ్వరులను సత్క

రించెడి – వేదధార్మిక సవిత్రి!

భాగవత – గీత – రామాయణ ప్రవచన సుధ

రమ్య “లలితా సహస్ర” పారాయణార్చ

నా ప్రియ! అఖిలభక్తజన హృదయాంత

రంగ! “విశ్వజనని! శతప్రణతులివియె!!

 

శ్రీ లక్ష్మణయతీంద్ర – శ్రీ శివానంద శ్రీ

సిద్ధేశ్వరముని – ఆశీఃవిరాజ!

గానగంధర్వుడా – ఘంటసాల మధుర

గీతాల నలరు – సంగీతరాజ్ఞి!

‘జమ్మలమడక’ కృష్ణభగవాను, “కరుణ-

శ్రీ” – ఉషః “శ్రీ-పదా”ర్చిత పురాణి!

విశ్వనాథ మహాకవి – “కులపతి”, మహతి

బృందావన కవితావన విహారి!

దివ్యపురుషులు సుమధుర భవ్యవాణి

నలరు “అమ్మ” దర్బారు దివ్యార్ష చంద్రి

కల – “మణిద్వీపమై” భువి వెలయ గాను;

“విశ్వకళ్యాణి!” “అపరరాజేశ్వరి!! కరు

ణార్ధ జననీ! “సువర్ణ పుష్పాంజలు”లివె!!!

 

“విశ్వజనని శతజయంతి” – విభవధార్మి

కోత్సవమ్ము – “అమ్మ”కు సువర్ణోత్సవమ్ము!!!

అఖిల భక్తుల – మాతృ పాదార్చనమ్ము!

భక్తకోటికి మోక్ష సోపానఫలము!!!

Attribution Policy : In case you wish to make use of any of the materials in some publication or website, we ask only that you include somewhere a statement like ” This digital material was made available by courtesy of Matrusri Digital Centre, Jillellamudi”.

error: Content is protected !!