(గత సంచిక తరువాయి)
- ఏ పూర్వ పుణ్యాన ఈ అమ్మ దర్శనంబంది ఆనందంబు నందినామొ
ఏ మాత స్పర్శచే ఈ జన్మ సార్థకంబగునని గుర్తించి అలరినామొ
ఏ తల్లి పలుకులు ఇంపైన బాటలై ఎడద నిండుగ పులకించి నామొ
ఏ అమ్మ చూపుల కరుణా స్రవంతిలో మునకలు వేయుచు మురిసినామొ
అట్టి జనయిత్రి మననెల్ల ఆదుకొనగ
అంతులేనట్టి వాత్సల్య మందరికిని
పంచిపెట్టుచు తనివార ఫలములిడగ
అవతరించెను ప్రేమతో అర్కపురిని,
- అనయము అమ్మనామమున అంకితభావము నిండియుండగా
అనుదిన మన్నయాగమును ఆదరమొప్పగ నిర్వహించుచున్
తనపర భేదమెంచకయె తత్పరులై కొనసాగుచున్న మీ
వినయము కార్యదీక్షయును విజ్ఞత చూడగ ముచ్చ టయ్యెడున్ ?
- మానస వీధి నెప్పుడును మాతను భక్తిని కొల్చుచుండగా
గానమువోలె జీవితము గమ్యము వైపుకు సాగుచుండెడున్
దానముచేయు బుద్ధియును ధైర్యము కల్గిన అమ్మ తోడ్పడున్
దీనత లేక మానసము దివ్యముగా వెలుగొంద జాలెడున్.
- చక్కని జీవితంబునకు చల్లనితల్లి అనుగ్రహంబదే
ఎక్కువ కారణం బనుచు ఎంతయు భక్తిని అమ్మసేవగా
తక్కిన వారి మేలునకు తత్పరతనని పార్వతీపురిన్
మిక్కిలి అన్నయాగమును మెల్లగ చేయగ నుద్యమించెడున్.
(సశేషం)