‘జగతః పితరౌ వందే పార్వతీ పరమేశ్వరౌ” అని ప్రార్ధన చేస్తూ ఉంటాం. ఆ ఆదిదంపతులే జిల్లెళ్ళమూడిలో కొలువై ఉన్న అమ్మ-నాన్నగారు. జగన్మాత అమ్మ అయితే జగత్పిత నాన్నగారు. ఒక సందర్భంలో లక్ష్మణయతీంద్రుల వారు అమ్మ, నాన్నగారల అర్ధనారీశ్వరతత్వాన్ని గురించి వివరిస్తూ “ఒకే ప్రమిదలో రెండు దీపకళికలు వెలుగుతున్నట్లు ఒకటే అయిన తత్త్వం ఇక్కడకు రెండుగా దిగి వచ్చింది. రెండుగా కనిపిస్తున్నా అనుకోకుండా. ఆ రెండు జ్వాలలు కలిస్తే ఒకటే జ్వాలగా ఉంటుంది. ఆ రెండింటిలో ఒకే తత్త్వం ఉంటుంది” అన్నారు. కనుక ఒకే శక్తి రెండు రూపాలు ధరించి అమ్మ, నాన్నగార్లుగా అవతరించటం జరిగింది. ఒకే శక్తి సృష్టికథ నడిపించటానికి రెండు రూపాలను ధరిస్తుందని భారతీయ సంప్రదాయం చెస్తోంది. ఆ రెండు రూపాలనే ప్రకృతి, పురుషుడు అంటారు. “ప్రకృతిం పురుషం చైవ విద్యనాది ఉభావపి” – అని భగవద్గీతలో శ్రీకృష్ణపరమాత్మ స్పష్టం చేశాడు.
భగవాన్ రమణమహర్షి దివ్యసన్నిధిలో ఉన్న కావ్యకంఠ వాశిష్ఠ గణపతిముని రామావతారంలోని సీతాదేవిని వర్ణిస్తూ “యజ్ఞమయమై జీవితం గడిపే ఒక అవతారమూర్తితో పాటు మరొక వ్యక్తి కూడ అవతరించటం సహజం, శ్రీరాముడి తత్త్వం లోకంలో ప్రసారం కావడానికి సీత వచ్చినట్లు” అన్నారు. అలాగే మానవిగా మాతృమూర్తిగా వచ్చిన అమ్మను కల్యాణం చేసుకున్న నాన్నగారు అమ్మ ప్రబోధించే సత్యాన్ని సందేశాన్ని లోకానికి అందించడానికి ఆధారమయ్యారు.
“నేను మీ ఇష్టప్రకారం నడుస్తున్నట్లు కనిపిస్తాను కానీ నా ఇష్టప్రకారమే మిమ్మల్ని నడిపిస్తున్నాను. మీ నడకకు, నడతకు ప్రేరణ నేనే” అన్న అమ్మను తన ఇష్టప్రకారం నడిపించి లోకారాధ్యులైనారు నాన్నగారు.. నాన్నగారిని ఆధారం చేసుకునే అమ్మ పాతివ్రత్యపు పరాకాష్టస్థితిని పొందినప్పటికీ అమ్మలో మాతృత్వమూ, దైవత్వమూ సాక్షాత్కరింప చేసుకున్న నాన్నగారు దివ్యులై అర్చామూర్తులయినారు.
మనకు భిన్నంగా కన్పిస్తున్నా అమ్మతో అభిన్నమైన పరమాత్మ నాన్నగారు. పార్వతీ పరమేశ్వరులు అర్ధనారీశ్వర స్వరూపులు. ఒకే పరతత్త్వంలో ఎడమభాగం అమ్మవారిగా కుడిభాగం పరమేశ్వరుడిగా సంపృక్తమయిన సమ్మేళన స్వరూపం. అలాగే అమ్మ. నాన్నగారు రెండు రూపాలుగా కన్పిస్తున్నా రెండూ కలిసిన ఒకే రూపం వారిది. అమ్మ మహాభినిష్క్రమణం తరువాత జరిగిన సన్నివేశమే మనకు ఈ విషయాన్ని స్పష్టపరుస్తున్నది. ఒకే గర్భాలయంలో అమ్మ నాన్నగార్ల ఇరువురి దివ్యమూర్తులను భద్రపరచడం జరిగింది. కానీ ఆ రెండు శరీరాలను అనుసంధానం చేస్తూ అమ్మ విగ్రహం ఒక్కటే ప్రతిష్ఠించడం జరిగింది. ఇది అమ్మ సంకల్పమే. అదే అనసూయేశ్వరాలయం పేరుతో అద్వైతానికి అర్ధనారీశ్వర తత్త్వానికి నిలువెత్తు ప్రతీకగా శివశక్యైక్యరూపంగా ఏకాకృతిగా విరాజిల్లుతూ ఉన్నది.
మహాశివరాత్రి మానవాళికి మహాపర్వదినం. అమ్మ సన్నిధిలో సర్వదినాలూ పర్వదినాలే అయినప్పటికీ ఏ పండుగ ప్రత్యేకత దానిదే. అమ్మ సశరీరంగా ఉన్నపుడు, ఆలయప్రవేశానికి ముందు, 1985 ఫిబ్రవరిలో శివరాత్రి పర్వదినాన శ్రీ అనసూయేశ్వరాలయానికి విచ్చేసి ఆసిన అయింది. ఆ రోజు ఫిబ్రవరి 17 నాన్నగారి ఆరాధనోత్సవం కూడా.
మనకి దిశానిర్దేశం చేస్తూ స్వయంగా కొన్ని కార్యక్రమానికి రూపకల్పన చేసి, దగ్గరుండి నిర్వహింప చేసింది. అందులో ఒకటి ఆ నాటి లక్ష బిల్వార్చన, అంతకు పూర్వం సో. జన్నాభట్ల శాస్త్రి అన్నయ్యతో “నాన్నా! శివరాత్రి నాడు లక్ష బిల్వార్చన చేసుకుంటే ఎలా ఉంటుంది!” అన్నది. అమ్మ మాట వేదవాక్కు ఆదేశంగా శిరసావహించి అన్నయ్య వెళ్ళి లక్ష బిల్వదళాలను సేకరించి తెచ్చారు.
ఒక వంక యాగశాలలో మహారుద్రయాగం. మరొక వంక అనసూయేశ్వరాలయంలో మహారుద్రాభిషేకం. అటు పిమ్మట శివసహస్రనామాలతో లక్షనామార్చన. ప్రక్కనే హైమాలయంలో శ్రీ అవధూతేంద్ర భక్తమండలి వారు నిర్వహిస్తున్న అఖండ రామనామ సంకీర్తన. మరో వంక అలంకార హైమక్కయ్య దగ్గర అమ్మనామ సంకీర్తన, ఇది నేను ప్రత్యక్షంగా చూసిన అద్భుతమైన సన్నివేశం. తల్లి. గురువు, దైవం అయిన అమ్మ భిన్నమార్గాల కూడలిలో నిలిచి ఎవరికి కావలసిన మార్గాన్ని వారు అనుసరించే అవకాశాన్ని కలిగించింది. లోకంలో ఆధ్యాత్మిక సాధనకు ఎన్నో మార్గాలున్నాయి. తమ అభిరుచిని బట్టి తమకు నచ్చిన తమకు అనుకూలమయిన సాధనామార్గాన్ని ఎన్నుకుంటారు. ఎవరి మనః ప్రవృత్తికి సరిపోయే మార్గం వారికి సరి అయినదిగా అన్పిస్తుంది. ఆ మార్గంలోనే వారు అధ్యాత్మికానుభూతిని పొందగలరు. ఈ భిన్న మార్గాల మధ్య వైవిధ్యమే కాని వైరుధ్యం లేదు.
‘ఏదయినా సాధనా మార్గం చూపించమ్మా’ అని అడిగిన బిడ్డలతో “సాధన కూడా సాధ్యం కావాలి గదా, నాన్నా!” నీకు ఏది సాధ్యమయితే దానినే సాధన చెయ్యి, సాధ్యమైనదే సాధన” అనీ, మరొక సందర్భంలో “అసలు ఆధ్యాత్మిక సాధన అంటే ఏమిటమ్మా?’ అని ఒకరు ప్రశ్నించగా “ఒకటి అనేకమయింది కనుక అనేకంలో ఒకదానిని చూడడమే ఆధ్యాత్మిక సాధన” అని ప్రబోధించింది. అమ్మ ఏ మార్గాన్నీ విధించలేదు, నిషేధించలేదు. అన్ని మార్గాలనూ ఆమోదించింది. అవి జిల్లెళ్ళమూడిలో మనకు మార్గ నిర్దేశం చేస్తూ ఉంటాయి. ఈ ప్రబోధాన్ని మనకు అందించటానికే అమ్మ నాన్నగారి ఆరాధనోత్సవం, మహాశివరాత్రి కలిసిన పర్వదినంలో అన్ని కార్యక్రమాలను ఏర్పాటు చేసిందేమో అన్పిస్తుంది.
ఆ అద్భుత సన్నివేశంలో శివశక్ష్యైక్యరూపిణి అమ్మ తన దివ్యసన్నిధిలో నాకు శివసహస్రనామాలు చదివే సదవకాశాన్ని అనుగ్రహించింది.
అమ్మకు శతాధిక వందనాలతో …..