17-2-2025న జిల్లెళ్ళమూడిలో SVJP ఉభయట్రస్టులు వైభవంగా శ్రీ నాన్నగారి ఆరాధనోత్సవమైన ధాన్యాభిషేకోత్సవాన్ని శ్రద్ధాసక్తులతో నిర్వహించాయి.
ఉదయం శ్రీ అనసూయేశ్వరాలయంలో శ్రీ బ్రహ్మాందం రవీంద్రరావు దంపతులు పంచామృతాలతో మహాన్యాసపూర్వక ఏకాదశ రుద్రాభిషేకాన్ని ప్రారంభించారు.
పిమ్మట హైమాలయ ప్రాంగణంలో సుందరంగా అలంకరించబడిన పూజావేదికపై దీపప్రజ్ఞలనం చేసి అమ్మనాన్నగారల ఉత్సవమూర్తులకు ధాన్యాభిషేకాన్ని ప్రారంభించారు.
వసుంధరక్కయ్యచే షోడశోపచారవిధిని అర్చింపబడి మనోజ్ఞంగా అలంకరింపబడిన అమ్మ నాన్నగారల కళ్యాణమూర్తులను సోదరీసోదరులు మంగళవాద్యాలతో పల్లకీలో ఊరేగింపుగా జయజయధ్వానాలతో శ్రీ అససూయేశ్వరాలయానికి తెచ్చారు. సర్వశ్రీ టి.యన్. శాస్త్రి, మధు అన్నయ్య, వి.ధర్మసూరి, వసుంధరక్కయ్య, ఎమ్.దినకర్ మున్నగు సోదరీసోదరులు అమ్మనాన్నగార్లను బియ్యంతో అభిషేకించారు. పిమ్మట అందరూ బారులు తీరి ధాన్యాభిషేకంలో పాల్గొన్నారు.
బాపట్ల నియోజకవర్గ శాసనసభ్యులు గౌ. శ్రీ వేగేశ్న నరేంద్రవర్మరాజుగారు అమ్మ, నాన్నగార్లను ధాన్యం, బియ్యంతో అభిషేకించి, అన్నపూర్ణాలయంలో అమ్మ (అన్న) ప్రసాదాన్ని సోదరీసోదరులతో సహపంక్తిన సంతోషంగా స్వీకరించారు. కళాశాల విద్యార్థులకు పురస్కారాలు అందజేశారు.
బస్సుల్లో కార్లలో ఆటోల్లో పరిసరగ్రామాల నుండి సుదూర పట్టణాల నుండి సుమారు 2000 మంది భక్తులు విచ్చేశారు. అమ్మ యందలి భక్తి విశ్వాసాలతో కొందరు తమ బంధుమిత్రులను కలసి విరాళాలను సేకరించి ఆన్లైన్లో సమర్పించగా కొందరు స్వయంగా తెచ్చి సభక్తికంగా సమర్పించారు. కొందరు రైతులు బియ్యం, ధాన్యం, పప్పు ధాన్యాల మూటలను తెచ్చి అమ్మశ్రీచరణాలకు సమర్పించారు.
ఉభయట్రస్టులు భక్తజనసందోహానికి ఉదయం అల్పాహారం, మధ్యాహ్నం విందు మున్నగు సతల సౌకర్యాలను కలిగించారు.
ధాన్యం అంటే – బీజం, సూక్ష్మరూపంలో ఉన్న మొక్క
ధాన్యం అంటే – ఆహారరూపంగా ఉన్న పోషకశక్తి.
ధాన్యాభిషేకం – అంటే మాధవసేవ, మానవసేవ సమష్టి రూపం.
అట్టి ధాన్యాభిషేక మహోత్సవంలో ఉత్సాహంగా పాల్గొని, ప్రత్యక్షంగా, పరోక్షంగా తమ సహాయ సహాకారాలనందించి, జయప్రదం చేసిన ఆశేష సోదరీసోదరులకు పేరుపేరున ఉభయ ట్రస్టులు కృతజ్ఞతాభి వందనములు తెలియజేశారు.