అమ్మకు సాటి ఈ ధరణి యందున గానగ రాదు

1. ఆ మహిమోజ్జ్వలంబులగు నానన సుందర దీప్తు లెల్లెడన్

కామిత దాయకంబులయి కన్నుల ముందట వెల్గుచుండగా

 ఆమెకు సాటి ఈ ధరణి యందున గానగ రాదు చూడగా 

ఏమియు చెప్ప జాలమిక యెల్లలు లేనిది అమ్మ ప్రేమయే.

 

1. అన్నము విద్యయు న్నొసగి ఆర్తిని బాపుచు నాదరించగా

 ఎన్నగరాని మోదముననెల్ల జనావళి మేలు పొందగా

 కన్నుల కాంతిరేఖలను గాంచుచు సంతసమొందుచుండి తా 

“కన్నది నేనె” యంచనెడి కామితదాయిని అమ్మ మ్రొక్కెదన్.

 

1. అమ్మే మమ్ముల నెంతయో తనదు దివ్యంబైన రూపంబుతో

 సమ్మోహంబును కల్గజేసి మదిలో సంవాసమున్ చేయగా

 సుమ్మా! యెంతటి పుణ్యమో ధరణికిన్ శోభస్కరంబై చనున్ 

రమ్మంచున్ ప్రియమార పిల్చి బ్రతుకున్ రాణింపగా జేయదే?

 

1. చూచినతోడ కాంతులవి చూపులు నిండవె అమ్మ సన్నిధిన్ 

తోచును క్రొత్తలోకమది; దూరము నయ్యెడు భీతి యంతలో

 సూచితమౌనుగా మదికి సుందర భావ ప్రపంచ మేదియో

 వీచెడు మందమారుతము విశ్వ విపంచిగ మారిపోవగా. 

 

1. ఉన్నత భావవైభవము నుజ్జ్వల రూపము భాషణంబులున్,

 సన్నుత రీతిగా నిలుచు సద్గుణ పుంజము సామరస్యమున్

 కన్నను విన్ననున్ మదికి కల్గునుగా మన ‘అమ్మ’ సన్నిధిన్ 

ఎన్నగరాని శాంతి, మరి యెందును గల్గునె యట్టి తృప్తియున్ ? 

 

1. తప్పులనెంచుట న్నదియు తల్లికి ధర్మము కాదటంచు తా

 నెప్పుడు బిడ్డలన్ గనిన నేరము లెంచక ప్రేమతో కడున్

 మెప్పుగ పల్కరించుచును మిక్కిలిగా తగు నాదరంబుతో

 ఒప్పులు నేర్పి జీవితము నుత్సవ మౌనటు తీర్చు అమ్మయే. 

(సశేషం)