అడుగడుగున కాపాడే ఓ అమ్మా! రాజరాజేశ్వరీ!
ఆశీర్వదించుము తల్లీ నీ చల్లని చూపులతో
ఇలలో నీవే – మా ఇలవేలుపు తల్లి
ఆదరించి ఆదుకునే కల్పవల్లీ!
ఉదయించే సూర్యునివలె నీ నుదిటికుంకుమ
ఊయలలూగే నాడెందము ఆ రవి బింబము చూచి,
ఋతువులలో శరదృతువు జాబిల్లి లా
వాత్సల్య శాంత శీతల జ్యోత్స్నలను కురిపించును
నీ వదనమండలము ఏమి వర్ణింతును
ఆ కరుణామృత దృక్కులను – మానవాళి మహద్భాగ్య రేఖలను.
ఐశ్వర్యప్రదాత్రి – ఆనంద సంధాత్రి
ఒక్కమాట చెప్పావంటే – అది సకల జీవనసారం
మార్గదర్శకం – మోక్షప్రదాయకం.
ఓనమాలు నేర్చుకుంటాం నీ ఒడిలో నీ బడిలో,
రూపుదిద్దుకుంటాం నీ వరవడిలో
నీ జీవిత మహోదధిలో తరంగ నాదం – వేదం
నీ పలుకులు – నీ సూక్తులు బ్రహ్మసూత్రాలై
తరతరాలు విని తరించాలి, ఆచరించి పరవశించాలి!
ఇంటింటా – సర్వేసర్వత్రా – సకల మనోమందిరాల్లో
నీ కీర్తి, నీ పిలుపు, నీ ఆదరణ, నీ కృప వెల్లివిరియాలి!!