ఘల్లు ఘల్లున పాదగజ్జెలందెలు మ్రోగ
కలికి అనసూయా కదలివచ్చింది.
మాతల్లి అనసూయా కనికరించిందీ.
చల్లని చిరుజల్లులు కుమ్మరించిందీ
ప్రేమ జల్లును కుమ్మరించిందీ.
ఎల్లలే లేని ఆ కన్నతల్లీ కరుణ
ఆ పల్లెనే వ్రేపల్లెగ మార్చుకుందీ
అల్లనల్లన గోపభామలను దరిజేర్చి
మెల్ల మెల్లగా శ్రీకృష్ణుడే తానంది
అనంద మొలకబోసింది.
అన్నమూ మాగాయ వెన్న మీగడ పెరుగు
పల్లవపాణి తన బిడ్డలకు పంచిపెట్టింది
— అనురాగ పూర్వక అంచులను చూపించి
పిన్న పెద్దల నెల్ల ఆదరించిందీ
మోదమిచ్చింది.
ఆకలే విలసిల్లు కలియుగమ్మూ లోన
అన్నపూర్ణగ నిలచి కడుపులో నింపింది
కలిమాయ పోగొట్టి కల్పవృక్షమై నిల్చి
అర్కపురి కేంద్రముగ లోకాలనేలింది
శ్రీరాజరాజేశ్వరి అమ్మ శ్రీ లలితాపరమేశ్వరి
||ఘల్లు||