చల్లని తల్లి

మమత, సమత, మానవత అన్నపుముద్దలో 

కలగలిపి మననోటికి అందించు అన్నపూర్ణ ॥

 అనురాగం, ఆప్యాయత రంగరించి

 మనలను ఆహ్లాదపరచు అనురాగవల్లి ॥ 

చందమామలో, చల్లగాలిలో పిల్లతెమ్మెరల

 చందాన మనమనస్సులకు హాయిగొలుపు చల్లని తల్లి

 విరిసే జాబిల్లి చల్లదనాలు, హరివిల్లులోని అందాల 

సొబగులను మనకు అందించు విరిబోణి ॥

 అందానికి అర్థం, ఆనందానికి భాష్యంగా 

మనస్సు అందంగా వుంటే చాలని తెలిపే ప్రేమమయి ॥

అంతులేని జీవనయానంలో ఎన్నో ప్రశ్నలు, ఎన్నెన్నో సమస్యలు

దారితెలియని పోరాటాలలో దారిచూపే మార్గదర్శి ॥ 

తేనెకన్న తీయనిపలుకులు, మంచుకన్న చల్లనిచూపులు

 మల్లెకన్న తెల్లనిమనస్సు, కల్లాకపటం లేని కలభాషిణి ॥ 

నీ సహజస్వభావం, నీ నిర్మలప్రేమ భావనతో 

తోటి సోదరులకు చేయూతనిమ్మనే స్నేహశీలి ॥ 

సత్యం, ధర్మం, శాంతి, ప్రేమ, మంచిని 

మనలో పెంపొందించు కరుణామయి 

చల్లనితల్లి – జిల్లెళ్ళమూడితల్లి