దేహ విభ్రాంతి తొలగించి, దివ్య ధామ
మిచ్చి, తన యొడిజేర్చి లాలించు తల్లి
ముక్తి రూపిణి, ఆరాధ్యమూర్తి అయిన
అమ్మ అడుగుదమ్ములకు నే నంజలింతు,
నీదగు సచ్చరిత్రమును నిత్యము చింతన సేయునట్లుగా
నీదగు దివ్యరూపమును నిత్యము ధ్యానము సేయునట్లుగా
నీదగు భవ్యసూక్తులను నిత్యము నామది నిల్చునట్లుగా
మూదల నీవె యౌచు నను ముందుకు సాగగ నిమ్ము శ్రీకరీ!
ధర్మమూర్తి అమ్మ దాక్షిణ్య పరసీమ
ప్రేమమూర్తి అమ్మ విశ్వ వంద్య
అమ్మ మారురూపు హైమవతీదేవి
అమ్మ హైమలకిదె అంజలింతు.
ఎంతదూరము మనవిద్య ఎదిగియున్న
అంతకంతకు పైమాట అమ్మ తెలుపు
సృష్టి నెల్లను నడిపించు శ్రీసవిత్రి
విద్యలకు విద్యయౌ గదా! విశ్వజనని.