1. Home
  2. Articles
  3. Viswajanani
  4. అమ్మకు అసలైన అర్చన

అమ్మకు అసలైన అర్చన

Mallapragada Srimanarayana Murthy
Magazine : Viswajanani
Language : Telugu
Volume Number : 22
Month : October
Issue Number : 3
Year : 2022

అమ్మఅడుగుల జాడల ననుసరించి 

అమ్మసూక్తులు దీక్షతో ఆచరించి

 అమ్మప్రేమకు వారసులైన వారె

 ధన్యతములంచు మనసార తలచుచుందు.


 తెలియవలసినట్టి దివ్య సందేశమ్ము

 అమ్మజీవితమ్మె యగును కాదె!

 ఆ చరణయుగమ్ము నరసేయుట కంటె

 ఆచరణకై మురియ అమ్మ, నిజము.


 విగ్రహమ్మునుండి వీక్షించు సర్వమ్ము

 బొమ్మ కానెకాదు, అమ్మ బ్రహ్మ.

 పరులబాగు కొఱకు బ్రతుకుట తెలియుటే 

విశ్వజనని మెచ్చు విరుల సరులు. 


రాతిబొమ్మను పూజించు ప్రీతికంటె

 సాటి ప్రాణుల సేవింప సార్థకమ్ము 

ఆర్తినొందిన వారిని ఆదుకొనుటె

 అసలు సిసలైన అర్చన అమ్మ కెపుడు. 


హృదిని ప్రేమ గలిగి ఎదుటివారికి సేవ

 అమ్మబ(ఒ)డిని నేర్చు అసలు చదువు.

 ఆలయమున సేయు అర్చన లన్నియు 

శిక్షణములు మనకు సేవకొఱకు.


– వ్యక్తిపూజనుండి వ్యక్తిత్వ పూజకు

 మార్పు చెంద వలయు మనము నిజము 

ప్రేమ సేవ శాంతి ప్రేరణ కావలె

 అసలు సిసలు పూజ అమ్మ కదియె.

Attribution Policy : In case you wish to make use of any of the materials in some publication or website, we ask only that you include somewhere a statement like ” This digital material was made available by courtesy of Matrusri Digital Centre, Jillellamudi”.

error: Content is protected !!