(పాట)
పల్లవి:
జిల్లెళ్ళమూడిలో
స్త్రీ రూప ధారిణియై
దిగివచ్చి నిల్చినది
దివ్య మాతృప్రేమ
॥జిల్లెళ్ళమూడిలో॥
చరణం 1:
ఆ ప్రేమధారలో
అత్మార్పణము చేసి
తరియింతురట దేహ
ధారులీ వసుధలో
॥జిల్లెళ్ళమూడిలో॥
చరణం 2:
కనుదోయి వర్షించు
కరుణారసము గ్రోలి
తమ్ము దా మరతురట
తత్సన్నిధానమున
॥జిల్లెళ్ళమూడిలో॥
చరణం 3:
చదవ లేదట సుంత
సర్వదివ్య జ్ఞాన
స్వారస్యములు దెలిపి
స్వాంత మలరించునట
॥జిల్లెళ్ళమూడిలో॥
చరణం 4:
తన సతీ ధర్మ మను
తత్పరత పాలించి
ఏమి యెరుగని యట్టు
లిద్దర నటించునట
చరణం 5:
తన బిడ్డలట లోక
మున గల్గు జనులెల్ల
తన ప్రేమ దుగ్ధముల
దనియించి బ్రోమనట
చరణం 6:
సందేహములు తీర్చి
శాంతి సుధ లొలికించి
ఘోర కానన మందు.
దారి చూపించునట.
॥జిల్లెళ్ళమూడిలో॥
చరణం 7:
దివ్యతేజము తోడ
దిశలు వెలిగించునట
వెతచెందు మనసులకు
వెలుగొనగి ప్రోచునట
॥జిల్లెళ్ళమూడిలో॥
చరణం 8:
ఎవ్వరో ఈ యమ్మ!
ఎందుకో ఈ రాక
ఏ తీరముల నుండి
ఏమి కొని తెచ్చినో?
॥జిల్లెళ్ళమూడిలో॥
చరణం 9:
ఈ ఎడారుల లోన
ఏ బీజముల నాటి
ఏ కల్పవృక్షాల
నిందు వెలయించునో?
॥జిల్లెళ్ళమూడిలో॥
చరణం 10:
ఏ మహోన్నత శక్తి
ఈ మాతృమూర్తి యై
హృదయార్తి నొలికింప
ఈ లోకమున దిగెనో?
॥జిల్లెళ్ళమూడిలో॥
చరణం 11:
అమ్మ అమ్మల కమ్మ
మేలి బంగరు బొమ్మ
అమ్మ వదముల కివే
ప్రేమ ప్రసూనాలు ॥2॥
మనవి : ఈ పాట రచయిత డా॥ శంకర శ్రీ రామారావు గారు ఏలూరు వాస్తవ్యులు, నేత్రవైద్యులు, ఏలూరు సోదరుల ద్వారా తెలుసుకొని అమ్మ మహత్వపూర్ణ నిజతత్వానికి నిలువుటద్దంగా వాస్తవ చిత్రణ చేస్తూ ఈ పాటను రచించి అమ్మ శ్రీ చరణాల మ్రోల ఉంచారు. తరువాత కాలంలో అనేక సార్లు జిల్లెళ్ళమూడి వచ్చారు. అమ్మ దివ్య మాతృప్రేమకి ముగ్ధులైనారు.
ఈ పాటలో కొంత భాగం ‘అమ్మ చలన చిత్రం’ లో స్థానం పొందింది: సుప్రసిద్ధ సినీ నేపధ్యగాయని. శ్రీమతి S.జానకి గానం చేశారు.
ఇది పూర్తి పాఠం; కావున సోదరీ సోదరులు గమనించగలరు.
(19-4-2024 అమ్మ 102 వ జన్మదినోత్సవ సందర్భంగా ప్రచురితము)