ఫిబ్రవరి విశ్వజనని మాసపత్రికలో శ్రీ మల్లాప్రగడ శ్రీమన్నారాయణమూర్తి గారి వ్యాసం ‘అమ్మ వాక్యం – అణిముత్యం 16’ ‘నాకు అడ్డుగోడలు లేవు’ నా హృదయాన్ని ఎంతో ఆకట్టుకుంది. అది చదివిన తర్వాత ఆ “హెచ్చరిక’ మన అందరికీ వర్తిస్తుంది అనిపించింది. చాల చక్కగా వివరించిన మాస్టారుగారికి నా ప్రత్యేక అభివందనములు.
అలాగే ఆగష్టు నెల ‘వీడ్కోలు’ చదివిన తర్వాత నాకు నిజంగా కళ్ళనీళ్ళు తిరిగాయి. ఆ వీడ్కోలులో నాదికూడా ఉంది అని ‘అమ్మ’ ని పదేపదే వేర్కొన్నాను. హృదయాన్ని కదిలించింది.
ఇదే ఫిబ్రవరి సంచికలో కామరాజు గారు రాసిన ‘కరుణ’ కూడా చాలా బాగుంది. “జ్ఞానులకు అజ్ఞానులను చూస్తే కలిగే మొట్టమొదటి ప్రతిస్పందన కరుణ” ఈ వాక్యం చదివిన తర్వాత నాకేమనిపించిందంటే అజ్ఞానులమైన మనందరిని అమ్మ కరుణే అమ్మకి దగ్గర చేసింది. పూర్తిగా మాయతో కప్పబడిన మనం ఎంత అజ్ఞానులమో అంత అదృష్టవంతులము. ‘అమ్మ’ ఆరాలో మనమంతా ఉన్నాము. ఎ.వి.ఆర్.సుబ్రహ్మణ్యం గారి వ్యాసాలు ప్రతి సంచికలో మొట్టమొదట నాచేత చదివించేట్టు చేస్తాయి. ఎంతమందో తమ అనుభవాలతో మనల్ని మరింత అలోచించేట్టు చేస్తున్నారు. ఉ॥ కొండముది సుబ్బారావు గారు, కామేశ్వర్రావు గారు మొదలైనవారు.
సర్వతోముఖాభివృద్ధి చెందుతున్న మన ‘విశ్వజనని’ మాసపత్రికను మనకందిస్తున్న ప్రచురణ కర్తలందరికీ పేరుపేరునా నా ధన్యవాదాలు తెలియపరుస్తున్నాను.